Ten Indictments – Paul Washer

Ek dink dit is tyd dat die kerk in Suid-Afrika hierdie hoor en werklik haarself begin ondersoek

Ten Indictments – Paul Washer

Kom ons vat hande -----> Relatief!

In ons pogings om akkomoderend te raak tenoor alle groepe en denominasies, is ons nie in wese besig om in 'n mate relatief te begin raak teenoor ons eie oortuigings nie?

Ek vra die vraag, want daar word in die naam van eenheid deesdae 'n menigte leerstellige verskille onder die mat ingevee. Is hierdie verskille nie besig om meer wesenlik te raak as wat ons te kenne wil gee nie?

Kom ons begin by 'n eerste voorbeeld, wedergeboorte. Jesus sê tog in Johannes 3 duidelik dat wedergeboorte totaal 'n werk van die Heilige Gees is, dat daar geen menslike hand by betrokke is nie. Romeine 3 leer vir ons dat niemand God gesoek het nie, dat almal gesondig het en ontbreek aan die heerlikheid van God, maar daar is diegene wat vandag in die meerderheid is wat glo 'n mens kan wel daardie eerste tree neem in die oorbrugging van daardie skeiding tussen mens en die heerlikheid van God, hierdie was die wortel van Palagianisme, wat geleer het dat die mens nie werklik so totaal gevalle is nie en dat hy wel sy sonde kan oorbrug om by God uit te kom. Diesulkes wat hierdie dinge geleer het in die vroeë kerk is duidelik uitgemaak as ketters, tog durf mens nie vandag opstaan en dit bestry nie, dan is jy arrogant en verwaand.

Dit is altyd vir my verstommend wanneer ek sien hoe gaande die hedendaagse Armeniaan is oor Spurgeon, maar dit is ook net 'n bewys van die feit dat ons 'n generasie geword het wat nie meer lees nie, wat so los en vas met inligting omgaan dat ons alles buite konteks aanhaal, is dit nie dieselfde Spurgeon wat uitlatings gemaak het soos:

I believe the man who is not willing to submit to the electing love and sovereign grace of God, has great reason to question whether he is a Christian at all, for the spirit that kicks against that is the spirit of the devil, and the spirit of the unhumbled, unrenewed heart.

En verder:

Answer me, ye that deny God’s sovereignty, and hate his election—how is it that angels are condemned to everlasting fire, while to you, the children of Adam, the gospel of Christ is freely preached? The only answer that can possible be given is this: God wills to do it.

Maar laat mens vandag so 'n uitlating maak, jy sal jouself baie vinnig op eukomeniese brandstapel bevind.

Nog 'n voorbeeld is wanneer dit kom by die lering oor en die werking van die Heilige Gees. Wanneer geloofsgemeenskappe die klem verkeerd begin plaas op die lering oor en die werking van die Heilige Gees en mens durf hulle daarop uitwys dat hulle die Heilige Gees beklemtoon in hul aanbidding ten koste van die Vader en die Seun, dan word jy afgemaak as een wat die werking van die Heilige Gees wil onderdruk. Tog leer die Woord in sy volheid vir ons dat die werking van die Heilige Gees is om altyd terug te wys na Christus en wat Hy ons geleer het aangaande die Vader soos Hy Homself aan ons in Christus geopenbaar het. Jesus leer self vir ons hieraangaande wanneer Hy sê:

Maar wanneer Hy gekom het, die Gees van die waarheid, sal Hy julle in die hele waarheid lei; want Hy sal nie uit Homself spreek nie, maar alles wat Hy hoor, sal Hy spreek en die toekomstige dinge aan julle verkondig. Hy sal My verheerlik, omdat Hy dit sal neem uit wat aan My behoort, en aan julle verkondig. Alles wat die Vader het, is myne; daarom het Ek gesê dat Hy dit sal neem uit wat aan My behoort, en aan julle verkondig.

Johannes 16:13-15

Mag 'n mens die waarheid verswyg om eenheid te bevorder? Nee, jy mag dit nooit doen nie en wanneer die Woord iets leer dan kan ons dit neem as waarheid. Dit is nie 'n kwessie van ek wat dink dat skrifinterpretasie by my begin en eindig nie, maar die Skrif wat homself verklaar en daarteen durf ons nie skop nie en ons durf daardie waarheid ook nie stil hou om 'n kunsmatige eenheid te bevorder nie. Dit is hartseer dat ons so verskil, maar ons sal ook moet besef, almal kan nie altyd reg wees nie, iemand is reg en iemand is verkeerd, iemand verkondig die Woord suiwer en iemand verdraai dit. Eenheid is in Christus, Christus is die volkome waarheid.

Of ons dit wil erken of nie, waarheid het in die kerk relatief geword, dit is nie meer 'n kwessie van wat die Woord leer nie, maar 'n kwessie van waarmee is ek gemaklik. Wanneer ek nie gemaklik daarmee is dat God beskik en bepaal nie, dan sê ek 'n mens moet 'n keuse uitvoer om gered te word. Eerlikwaar, my vlees is nie gemaklik daarmee dat God beskik en bepaal nie, maar dan weet ek ook, my vlees is in rebellie teen God, so wat kan ek, o mens, dan anders doen as om myself as God se kind onder sy gesag te plaas.

Maar tog, o mens, wie is jy wat teen God antwoord? Die maaksel kan tog nie vir die maker sê: Waarom het u my so gemaak nie?

Romeine 9:20

Wat is ons besig om met die Evangelie te maak?

Ons het begin dink dat ons al die antwoorde het en dat niemand ons meer hoef te leer nie, wanneer enigeen durf na ons toe kom met 'n vraag oor die leer wat ons aanhang, die leer van die Soewereiniteit van God, slaan ons toe en probeer Calvinisme met alle krag in ons verdedig, dit ten koste daarvan om eenvoudig net die vrae te antwoord vanuit die Woord.

Die Woord is duidelik, verkondig die evangelie aan alle mense, meet mense se getuienisse aan die vrug wat hul lewens oplewer. Gaan na al die nasies. Wees vriendelik teenoor alle mense, wees huislik, wees opreg, wees nederig. Vir daai onthalwe, hoe weeg ons vrug op teen die vrug van die Gees.

Kom ons staan net stil by nederigheid, ja ons is oortuig ons leer is Bybels en is korrek, ja ons weet dat dit die leer is wat van die begin af was, dat dit is wat Jesus geleer het, dat dit is wat die Apostels geleer het, dat Paulus vir Timoteus sê om te volhard in hierdie leer en om dit te verkondig tydig en ontydig, maar ek sien werklik nie waar ons die reg het om arrogant daarmee te begin raak nie. Mens jy is 'n sondaar gered deur die genade van God, nie uit jou verdienste of enigiets wat jy gedoen het nie, jy is wie jy nou is te danke aan die genade en liefde van God, jy durf nie dit gebruik tot arrogansie nie.

Dis tyd dat ons weer opreg mense die geleentheid bied om ons te nader sodat hulle die evangelie kan ontvang, ja die "alter call" is nie Bybels nie, ja ons kan nie ons hartjies vir Liewe Jesus oopmaak nie, maar ons het steeds die opdrag om die evangelie te verkondig en dissipels te maak, raak persoonlik betrokke in mense se lewens, MET DIE EVANGELIE. Dis die evangelie wat God se reddende genade dra, jy mens, verkondig dit, tydig en ontydig, wees beskikbaar, wees nederig.

Die Evangelie is vir Almal

Want die reddende genade van God het aan alle mense verskyn
Titus 2:11

Dit wil vir my voorkom asof daar 'n mate van verwaantheid onder Calviniste begin insluip en dit is dat aangesien Jesus slegs die sondes van die uitverkorenes aan die kruis gedra het, die evangelie nie aan die hele wêreld verkondig moet word nie, dat ons moet agteroorsit en toelaat dat God red en onsself nie besig hou met die prediking van die evangelie aan 'n verloregaande wêreld nie.

Hierdie posisie is niks anders as klassieke Hiper Calvinisme nie, ons moet nooit vergeet die mens het 'n verantwoordelikheid en die mens het 'n opdrag, God se soewereiniteit negeer in geen mate ons verantwoordelikheid en opdrag nie. Dit is nodig dat ons God se soewereiniteit altyd bo-op stel, dat ons dit verstaan en dat ons dit aan ander leer, maar ons kan nie ten koste van God se soewereine wil sy geopenbaarde wil ignoreer nie.

God se geopenbaarde wil is dat ons die evangelie moet verkondig, tydig en ontydig. Hou op verskonings soek en hou op jou opdrag versuim, daar is mense wat verlore gaan, het ons dan nie meer 'n hart vir verlore siele nie? Laat God bepaal watter harte Hy gaan voorberei in ontvanklike grond en laat ons oral saai solank daar nog geleentheid is om te saai.

Gaan dan heen, maak dissipels van al die nasies, en doop hulle in die Naam van die Vader en die Seun en die Heilige Gees; en leer hulle om alles te onderhou wat Ek julle beveel het.
Matteus 28:19

TULIP as eenheid

Daar is al baie gedebatteer oor die vyf punte van Calvinisme ook bekend as TULIP:

Total Depravity

Unconditional Election

Limited Atonement

Irresistible Grace

Perseverance of the Saints

Dit is baie belangrik om te verstaan dat hierdie vyf punte nie deur Calvyn self opgestel is nie, maar as antwoord op die dwalinge van Armenius en sy volgelinge deur die Nasionale Sinode van die Gereformeerde Kerke van die Verenigde Nederlande in 1618 en 1619 in Dordrecht en dat TULIP ‘n basiese opsomming is van die vyf hoofstukke van die Dordtse Leerreëls.

TULIP is wel gebasseer en gebou op die leringe van Calvyn, die vroeë kerkvaders soos Augustinus en uiteindelik die leer van die vroeë kerk, die leer van die Apostels self, maar dit is ook nodig om in ag te neem dat TULIP slegs gebasseer is op ‘n gedeelte van die teologie van Calvyn, in spesifiek Soteriologie en nie die totale omvang is van sy teologie nie. Calvyn se teologie begin en eindig by God en sy Soewereiniteit.

Die doel van hierdie skrywe is egter om daarop te wys dat die vyf punte van TULIP nie afsonderlik van mekaar beskou kan word nie, dat mens nie een kan hou maar nie die ander nie. Hiermee poog ek om te bewys dat TULIP ‘n onlosmaakbare eenheid is wat vyf onderafdelings van ‘n geheel is, soos ek ook glo die oorspronklike bedoeling van die Dordtse Leerreëls is. Verder sal hierdie skrywe ook uitwys hoe fataal die verwerping van een van hierdie punte is.

Die feit dat die mens totaal gevalle is en gebonde is in sonde (T) bepaal dat hy in geen mate enigsins homself kan red nie en dat God die werk van redding moet doen gebasseer op Sy voorbesluit en uitverkiesing van die wat Hy sal red (U). Daarom het Hy Sy Seun gestuur om die straf van die sondes van hulle wat gevalle is en deur Hom tot lewe uitverkies is te dra, en die toorn van God se geregtigheid is op Sy Seun uitgegiet in die plek van die uitverkorenes. Daarmee is hul sonde volkome betaal en is daar geen skuld meer daaraan verbonde nie, en daarom kon Jesus aan die kruis sê dit is betaal en leer Romeine 8:1 ons dat daar geen meer veroordeling vir die uitverkorenes is nie. God is regverdig en sal nie iemand straf indien daardie straf reeds uitgedien is nie, daarom is die bewering dat Jesus vir die hele wêreld, selfs diegene wat nie uitverkies is tot die lewe nie, se sonde gestraf is 'n dwaling en weet ons volgens God se regverdigheid dat hierdie straf op Jesus afgekom het slegs vir God se uitverkorenes (L). Wanneer die Heilige Gees hierdie genade wat God aan die uitverkorenes wil bied aan hulle voorhou en die toestand van die sondaar voor 'n heilige God openbaar, kan hy nie anders as om hierdie genade te ontvang nie (I), dit is vir hom onweerstaanbaar, hy wat dood is het tot die besef gekom dat hy dood is, sal die lewe wat hom gebied word nie kan of wil weier nie. Die refleksie op sy gevalle toestand en die besef van die heiligheid van God tesame met God se soewereiniteit in die uitverkiesing van hulle wat die effektiewe roep van die Heilige Gees ontvang het loop altyd hand aan hand en is onlosmaakbaar van mekaar. Dit bring ons by die laaste punt, die volharding van die uitverkorenes, of die volharding van die heiliges (P) wat saam met die res van die punte staan, aangesien die res van die punte duidelik bewys dat redding en saligheid 'n werk van God is en geen hand van die mens in het nie. Dit leer dat die mense nie 'n keuse kon uitvoer in sy saligheid nie en dat as hy eenmaal nie die genade van God kon weerstaan nie, hy deur daardie selfde genade wat hom gered het in bewaring gehou sal word en nie weer 'n keuse kan of sal uitvoer om daardie saligheid te verloor nie, aangesien hy na die eerste verligting van die Heilige Gees nie die genade kon weerstaan nie. God het die mens gered vir sy Heerlikheid om sy Naam groot te maak en sal dus ook die mens hou in daardie toestand, want dieselfde God wat magtig genoeg was om sy volk uit Egipte te lei is magtig genoeg gewees om sy volk in die beloofde land in te lei, om sy Naam ontwil en vir geen ander rede nie.

Die verwerping van die totale gevalle toestand van die natuurlike mens lei tot Palagianimse wat leer dat die mens in staat is om God te kies, dit loop uit op ‘n werke godsdiens waar die mens ‘n hand in sy saligheid het. (Rom 3:11, Rom 3:23, Rom 5:12, Rom 5:16, Rom 6:23)

Die verwerping van die absolute uitverkiesing van die mens deur God lei tot ‘n verwerping van die Soewereiniteit van God en ontneem God van sy posisie as die Bewerker van die saligheid van die mens, maar maak eerder die mens God se instaatsteller deur sy humanistiese keuse. (Joh 17:6, Hand 13:48, Rom 8:29, Ef 1:4)

Die verwerping van die beperkte boetedoening en versoening van Jesus aan die kruis maak God onregverdig in die sin dat Hy daardeur sondaars wat nie tot saligheid gekom het nie weer straf vir ‘n straf wat reeds uitgedien is deur Jesus aan die kruis. (Deut 32:4, Ps 145:17, Joh 10:15, Hand 17:31)

Die verwerping van onweerstaanbare genade maak dat genade nie meer genade is nie en totaal krag verloor aangesien hierdie genade van God dan nie in staat is om volkome te red nie aangesien dit deur die mens geweier kan word. (Eseg 36:26, Rom 3:24, Ef 2:8, Heb 8:10)

Die verwerping van die volharding van die heiliges maak God en Sy Naam tot ‘n bespotting, want dieselfde God wat volkome en alleen saligheid kan bewerk is dan nie meer in staat om deur daardie selfde krag diegene wat Hy uitverkies het in bewaring te hou tot die dag van verlossing nie. (Joh 10:28, Rom 8:35, 1 Kor 1:8, Ef 4:30)

Dus, vanuit die verstaan van die betekenis van elk van die afsonderlike punte kan ook gesien word dat hierdie punte onlosmaakbaar van mekaar staan, daar waar die een staan, staan die ander ook, daar waar die een val, val die ander ook. Geen van hierdie punte kan afsonderlik gehou word nie en al hierdie punte word deur die volheid van die Skrif bevestig en saamgesmelt.

Die Twee Vriende van Johannes 6

Die laaste deel oor die uitverkiesing deur Nico vd Walt van Antipas Gereformeerde Baptiste Gemeente

Die Uitverkiesing No. 3 - Nico vd Walt

Uitverkiesing en die Mens se Wil

Ek plaas graag vandag die 2de van die 3 dele oor die uitverkiesing deur Nico vd Walt, Uitverkiesing en die Mens se Wil

Die Uitverkiesing No.2 - Nico vd Walt

Uitverkiesing

Seker een van die grootse besprekings in geloofskringe is oor die bepaling van wedergeboorte, het die mens 'n keuse (vrye wil) of is redding totaal 'n werk van God en Hom alleen (uitverkiesing), bepaal die mens sy wedergeboorte deur 'n vrye wil of bepaal God 'n mens se wedergeboorte deur Sy soewereine wil? Ongelukkig word hierdie gesprekke gevoer op 'n vlak wat die mens se gevoelens en persepsies akkomodeer en nie noodwendig altyd objektief na die Skrif kyk nie, vir die mens blyk uitverkiesing deur God onregverdig te wees en voel hulle dit is nie redelik dat die mens nie 'n keuse, 'n sê in die saak het nie.

Indien ons werklik hierdie leer van die Bybel in sy totaliteit wil bestudeer en beter verstaan, is dit nodig dat ons verby die dooi perde kyk wat steeds geslaan word en werklik moeite doen met alle aspekte van hierdie Bybelse leer. Dit sal behels dat ons kyk na die karakter van God, die werking van die Heilige Gees, die toestand van die mens en alle bydraende faktore en nie bloot uitgaan met 'n persepsie van, as God mense vir die hemel bestem, bestem Hy ander vir die hel nie.

Goeie betroubare materiaal oor hierdie onderwerp is redelik skaars in Afrikaans, veral op die internet, maar soos die Here dit bestem, het ek die voorreg gehad om die werk van Nico vd Walt op die webwerf van Antipas Gereformeerde Baptiste Gemeente raak te loop en wil ek skakel na sy 3 dele oor die uitverkiesing oor die volgende paar dae.

Dus, sonder enige verdere kommentaar van my kant af

Die Uitverkiesing No. 1 - Nico vd Walt

Was Yahweh aan die patriarge bekend?

Ek lees die berig op Beeld se webwerf van Cas van Rensburg getitel Evolusie van God 'n opdraande pad , 29 Mei 2009.

Wat my veral opval is die uitlatings aangaande Abraham, Isak en Jakob wat skynbaar nie vir God geken het soos Moses Hom geken het nie en volgens Prof. Esterhuyse waarskynlik nie eers dieselfde God aanbid het nie. Hierdie liberale stroom beweer dat God soos Hy aan die patriarge bekend was, was maar een van 'n groot aantal gode wat ontstaan vanuit die vroeë godsdienstige beskouings in Mesopotamië. El Shaddai word dus deur hulle beskou as 'n berg god, soos vele ander. Hierdie beskouings het egter geen substans nie, soos ons later sal leer. Daar word ook vir ons voorgehou dat Moses monoteisme "ontwerp" het en aan die volk bekend gestel het, selfs hierdie uitlatings sal bewys word as foutief.

Natuulik ontstel sulke berigte met hierdie tipe uitlatings mens wesenlik en wou ek so vinnig moontlik 'n antwoord op die berig formuleer, maar soos dit bestem was want ons weet alles is bestem deur 'n Opperhand, lees ek dievolgende skrywe van John J. Davis THE PATRIARCHS' KNOWLEDGE OF JEHOVAH. 'n Beter antwoord op hierdie liberale beskouings is moeilik om te vind, ek hoop die lees hiervan kan vir ander ook so leersaam en verligtend op die onderwerp wees soos wat dit vir my was.

Aan God wat Homself aan ons openbaar vanuit sy Woord al die eer, ons dien 'n ewige God.

Geloof verloor of nooit geloof gehad?

Ek verwys vandag na 'n artikel in die Beeld, 'Talle verlaat Christen-geloof' .

Ek wil bietjie McKnight se sg. "vyf faktore wat baie mense se Christelike oortuigings in ’n krisis laat beland" ondersoek.

• Die rigiede leer dat die Bybel onfeilbaar is. Volgens hom berus dit op ’n foutiewe leer by kerke dat die Bybel as’t ware deur God aan die Bybelskrywers gedikteer is. Mense wat die Bybel dan self bestudeer, kom later met ’n skok agter dat daar baie van die menslikheid van die Bybelskrywers in hul geskrifte te sien is.

Blykbaar is hierdie oortuiging wat as 'n fondament van die Christen geloof staan vir 2,000 jaar, skielik volgens McKnight foutief. Nou my verstaan was nog altyd dat as 'n persoon 'n stelling wil maak die onus op daardie persoon berus om feite aangaande sy stelling op die tafel te sit. Ek sien McKnight is vinnig met sy stellings om te beweer die Kerk het 'n foutiewe leer, maar hy saai egter verwarring en gee nooit substansiële bewyse vir sy uitlatings nie. Enige kerk wat nie glo die Bybel is die onfeilbare Woord van God nie, is dit nie werd om 'n kerk genoem te word nie. Mense wat die Bybel bestudeer en dit as feilbaar ervaar, het heel moontlik nie die sleutel tot die verstaan van die Bybel nie.

Maar die natuurlike mens neem die dinge van die Gees van God nie aan nie; want dit is vir hom dwaasheid, en hy kan dit nie verstaan nie, omdat dit geestelik beoordeel word.

1 Korintiërs 2:14

• Die botsing tussen die wetenskap en geloof, spesifiek waar kerke leer Genesis vertel presies hoe die wêreld ontstaan het.

Weereens, McKnight aanvaar sommer die algemene gevoel van die wêreld hieraangaande en doen self nie die moeite om sy voorbeelde van hierdie sg. botsings aan die lig te bring nie. Nou dit is maklik om 'n stelling te maak dat daar botsings tussen geloof en wetenskap is, veral waar kerke leer Genesis vertel presies hoe die wêreld ontstaan het en dit bloot daar te laat sonder om enigsins verder eerlik met die stelling om te gaan. Nou McKnight glo dan sekerlik dat die Oerknal die presiese ontstaan van die wêreld vertel, of iets soortgelyk, maar is McKnight en diegene wat soos hy redeneer eerlik met hulself as hulle dan beweer dat hierdie geloofsisteem (want evolusie is 'n geloofsisteem) nie bots met wetenskap nie? Vir diegene wat hierdie geloof het, dink ek is daar meer botsings met wetenskap as wat hulle die oningeligde Christene van beskuldig. Hulle geloofsisteem is wetenskaplik totaal onmoontlik. Dit kom weer terug op die basiese punt van iets uit niks, iets kan nie uit niks ontstaan nie, dit moet geskep word. Nou ek gee toe, beide die ware Christen en die sekulêre evolusionistiese wetenskaplike begin met 'n hipotese, maar kom ons wees eerlik, evolusie se hipotese werk net eenvoudig nie en skep net meer probleme waarvoor meer hipoteses ontwikkel moet word. Die skeppingsleer se hipotese werk immers en bly konstant sonder verandering.

• Die manier waarop Christene en die kerk leef. Hy het verwys na die skandale van seksuele misbruik in die Rooms-Katolieke Kerk in die VSA en hoe dit sommige mense laat voel het dat hulle nie met integriteit deel van die kerk kon bly nie.

Nou goed, koms ons begin by die eerste aantuiging, hoe Christene en die kerk leef. As ons eerlik met onsself moet wees dan moet ons die koppe in skaamte laat sak, want hier het dit fout gegaan. Kerke pas nie meer tug toe nie wat veroorsaak dat lidmate in ontug lewe, baie male sonder enige vrug van bekering, maar hulle word geag as Christene en word direk deur mense verbind met die Kerk van Christus. Ons as opsigters het ons taak hier versuim oordat ons mense meer vrees as God en Sy Naam.

Maar dan maak McKnight weereens een van sy fatale foute. Hy gebruik as barometer vir die Christen Kerk 'n instelling wat nie geag word as 'n Christen Kerk nie, die RKK se leer is verwyder van die gesonde leer van Jesus Christus en berus op 'n werke geloof, hierdie kerk is nie 'n geldige voorstelling van hoe 'n Christen Kerk moet lyk of funksioneer nie.

• Die beskouing van die hel. Baie mense kan nie aanvaar dat dit billik is dat God iemand vir ewig straf vir sondes in ’n tydelike lewe van miskien 75 jaar nie. Hulle vra of die straf nie by die oortreding moet pas nie.

Want baie mense is meer bekommerd oor hul eie humanisme en is so besig om die god van hulle eie lewens te speel of 'n meer aanvaarbare god vir hulself te skep dat hulle nooit uitkom by wie God waarlik is nie. Hierdie is nie 'n probleem wat McKnight met die kerk het nie, hierdie is 'n probleem wat hy met die Woord van God, met God self het. Ek sal berus by die woorde van John MacArthur dat ons nie meer liefdevol as Jesus moet probeer wees nie, maar dat ons sal praat oor die hel.

Dit is ook MacArthur wat in 'n onderhoud dit so treffend gestel het as hy sê “jy kan glo jy kan vlieg, maar as jy van 'n 10 verdieping gebou afspring sal jy steeds sterf.” Jy kan glo daar is nie 'n hel nie, dit vat nie die werklikheid daarvan weg nie.

• Die “God van die Bybel” wat dikwels voorgehou word, skrik baie mense ook af. Daar word onder meer geredeneer dat as God almagtig is, hy nie goed kan wees nie, anders sou die wêreld nie so vol kwaad gewees het nie. En as hy goed is, kan hy nie almagtig wees nie, want anders sou hy die boosheid gekeer het.

Natuurlik is dit vir ongeredde mense 'n probleem want hulle wil 'n god hê wat hulle sal dien, hulle wil nie hulself plaas onder 'n Oppergesag nie en dit is weens 'n valse leer van evolusie wat impliseer dat daar nie 'n Skepper is nie, as daar nie 'n Skepper is nie, is daar nie 'n Oppergesag nie en is die mens die god van sy eie heelal. Daarom is die probleem wat McKnight en ander soos hy het nie die leer van die Kerk nie, hulle het 'n probleem met God, is vriende van die wêreld en in vyandskap met Hom.

U sien, aan die einde van die dag moet die mens wat sy eie god is redeneer dat waarheid relatief is, want as hy aanvaar daar is 'n absolute waarheid êrens daar buite, besef hy dat hy homself ondergeskik gaan moet stel aan daardie waarheid. Die probleem is hier dat mense nie bereid is om hulle onder die Weg, die Waarheid en die Lewe te stel nie, want dan gaan hulle onttroon word as die god van hul lewens.

Kom ons noem nou maar 'n graaf 'n graaf. 'n Persoon wat 'n probleem het met een van hierdie 5 faktore moet minder bekommerd wees om sy geloof te verloor as wat hy moet besef, daar was nooit 'n werk deur God in hul lewens om mee te begin nie.

Soeke na die Aangesig van God

DIE VURIGE EN KRAGTIGE GEBED VAN DIE REGVERDIGE

Iets wat my onlangs meer en meer pla is kinders van die Here se gebebedslewens, my eie gebedslewe.Hoekom ervaar ons so baie maal dat ons gebedslewens so dood voel, hoekom ervaar ons nie meer die krag van gebed nie?

Die Woord leer ons tog in Jakobus 5 vers 16 dat die vurige gebed van ’n regverdige groot krag het.

Hoekom ervaar ons nie meer hierdie vuur en krag in ons gebedslewens nie?

Is dit dalk oordat ons nie meer bid as regverdiges nie?

As ek kyk na Psalm 24 vers 3-4, dan blyk dit tog die geval te wees. Kom ons begin by hierdie teksgedeelte, dan kyk ons bietjie na wat die Woord van God sê aangaande die soeke na Sy aangesig.

Wie mag klim op die berg van die HERE? En wie mag staan in sy heilige plek?

Hy wat rein van hande en suiwer van hart is, wat sy siel nie ophef tot nietigheid en nie vals sweer nie. Psalm 24:3-4

Ek sal graag wil hê dat ons saam ondersoek wat die Woord bedoel as daar staan iemand moet rein van hande en suiwer van hart wees.

REIN VAN HANDE

Rein van hande beteken vir my dat jy skoongewas voor God kom staan, dat sondes nie aan jou vaskleef nie, dat jy na God toe kom sondeloos. Nou mag jy dadelik vir my sê dat as ek die Woord ken, daar in 1 Johannes 1 vers 8 staan:

As ons sê dat ons geen sonde het nie, mislei ons onsself en die waarheid is nie in ons nie. 1 Johannes 1:8

Daarmee durf ek immers nie stry nie, maar die Woord stop nie daar nie, die Woord gaan verder en sê in 1 Johannes 1 vers 9:

As ons ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig. 1 Johannes 1:9

Jy sien, dit is van absolute belangrikheid dat ons gereining word van alle ongeregtigheid, dat ons hande rein sal wees as ons na God toe wil kom vir ’n ontmoeting. Hierdie reiniging geskied slegs deur die bloed van Jesus Christus, dit is nie vir ons moontlik om onsself te reining nie, maar sonde moet mee gehandel word en dit gebeur as ons na Christus toe kom en ons sondes bely. Die Heilige Gees oortuig die kind van God van sondes, die kind van God moet dan die sondes bely en by die kruis van Christus kom neersit en dan sê die Woord vir ons in Openbaring 12 vers 11:

En hulle het hom oorwin deur die bloed van die Lam en deur die woord van hulle getuienis... Openbaring 12:11

Volharding in sonde

Ek gaan nou ’n baie sterk stelling maak en ek weet ’n baie ongewilde een. Jy kan nie ’n vurige, kragtige gebedslewe hê as jy volhard in sondige weë nie, want jy kan nie rein en regverdig voor God kom staan as jy nie deur Christus gehandel het met sondes deur dit te bely by die kruis nie.

Verstaan ons nogsteeds nie wat by die kruis gebeur het nie? By die kruis is daar gehandel met sonde, jy kan nie na die kruis toe kom sonder ’n sondebesef nie. Die kruis drip nie heuning nie, dit drip bloed.

Gebed van die ongelowige

Ek gaan nog ’n sterker en meer ongewilde stelling maak. Iemand wat nie Jesus as sy Verlosser aangeneem het nie, kan nie eers in gesprek met God tree nie, om nie eers te praat van Sy aangesig soek nie. Hoe kan ek iets so hard sê? Want dit is wat die Woord van God leer.

Wat die Heilige Gees doen tydens gebed

Maar jy, wanneer jy bid, gaan in jou binnekamer, sluit jou deur en bid jou Vader wat in die verborgene is; en jou Vader wat in die verborgene sien, sal jou in die openbaar vergelde. Matteus 6:6

Wat bedoel die Bybel met verborgene? Ek verstaan dit as die dinge wat nie gesien kan word nie, dit waarin ons ook glo.

Die geloof dan is 'n vaste vertroue op die dinge wat ons hoop, 'n bewys van die dinge wat ons nie sien nie. Hebreërs 11:1

Hoe bid jy dan tot die Vader wat in die verborgene is? Die Woord gee weer vir ons hier die antwoord.

God is Gees; en die wat Hom aanbid, moet in gees en waarheid aanbid. Johannes 4:24

En net so kom ook die Gees ons swakhede te hulp, want ons weet nie reg wat ons moet bid nie, maar die Gees self tree vir ons in met onuitspreeklike sugtinge. Romeine 8:26

Wat Jesus doen tydens gebed

Kom ons gaan verder en kyk wat Jesus vir ons doen.

Daarom kan Hy ook volkome red die wat deur Hom tot God gaan, omdat Hy altyd leef om vir hulle in te tree. Hebreërs 7:25

Jesus antwoord hom: Ek is die weg en die waarheid en die lewe; niemand kom na die Vader behalwe deur My nie. Johannes 14:6

En Hy wat die harte deursoek, weet wat die bedoeling van die Gees is, omdat Hy ooreenkomstig die wil van God vir die heiliges intree. Romeine 8:27

Ons kan dus duidelik sien dat dit nie moontlik is om na die Vader te gaan in gebed sonder dat jy Jesus as jou Verlosser het nie, want ons gaan na die Vader deur Jesus Christus onder die leiding van die Heilige Gees. As jy skoongewas is deur die bloed van die Lam, kan jy voor God verskyn in regverdigheid en tot Hom bid deurdat die Heilige Gees jou die woorde gee om dit te kan doen.

Hieruit behoort dit ook duidelik te wees dat as jy nie volkome in Jesus is nie en nie na die oortuiging van die Heilige Gees oor sonde in jou lewe luister nie, jy nie kan verwag dat jy ’n kragtige en vurige gebedslewe sal hê nie.

Sonde behaag God nie

Moet nie vra hoekom jy nie die teenwoordigheid van God in jou binnekamer voel, maar jy stap daar uit en steek nog ’n sigaret aan nie. Want jy sal nie ’n vurige gebedslewe hê nie, ek getuig hier uit persoonlike ondervinding, want ek was daar.

Moenie terwyl jy rondslaap, in die aande in jou bedjie kom lê en vra hoekom God nie jou gebede beantwoord nie. Jou geestelike lewe behaag God nie, jou gebedslewe sal Hom ook nie behaag nie. Gee jy jou liggaam as ’n welgevallige offer vir God? Met ander woorde, ’n offer wat vir Hom aanvaarbaar is.

Jy moet met jou sonde handel voor jy die troonkamer van God wil inkom.

’N SUIWER HART

Dit bring ons dan by die volgende vereiste om op God se heilige plek te staan. Jy moet ’n suiwer hart hê. Maar wat beteken dit? Vir my beteken dit ’n hart wat nie begeer wat die wêreld vir hom probeer bied nie, maar ’n hart wat alles begeer wat vir God goed en aanvaarbaar is. Dit is nie ’n hart wat sê “Here ek wil...” nie. Dit is ’n hart wat vra “Here, wat wil U...?”

Kom kyk saam met my wat die Woord van God ons leer oor so ’n hart.

Ek vermaan julle dan, broeders, by die ontferminge van God, dat julle jul liggame stel as 'n lewende, heilige en aan God welgevallige offer dit is julle redelike godsdiens. Romeine 12:1

Die verskil tussen Kain en Abel se offers

Deur die geloof het Abel 'n beter offer aan God gebring as Kain, waardeur hy getuienis ontvang het dat hy regverdig was, omdat God oor sy gawes getuienis gegee het; en deur dieselfde geloof spreek hy nog nadat hy dood is. Hebreërs 11:4

Jy sien, die verskil tussen Kain en Abel se offers was dat Abel se hart begeer het om God te vereer en gelukkig te maak. Kain het sy offer gebring oordat dit vir hom gelyk het soos iets wat hy maar net moet doen. Sy offer het nie oor God gegaan nie, maar oor homself.

En Abel het ook van die eersgeborenes van sy kleinvee gebring, naamlik van hulle vet. En die HERE het Abel en sy offer genadig aangesien, maar Kain en sy offer nie aangesien nie. Toe word Kain baie kwaad, en hy het sy hoof laat hang. Genesis 4:5

Die hart van Kain in godsdiens vandag

Vandag sien ons steeds soveel mense kerk toe kom, Bybel lees en gebedjies opsê oordat hulle voel dit is die regte ding om te doen, hulle kom nie kerk toe, bestudeer die Woord en spandeer tyd met God oordat hulle harte ’n vurige begeerte het om God te dien, meer van Sy wil in hul lewens te leer en Hom te vereer nie.

Is dit hoe jou lewe lyk? Dan wil ek reguit en duidelik vir jou sê; aanbidding, ware aanbidding, gaan nie oor jou nie. DIT GAAN OOR GOD.

Jou menslike regtetjies, jou egotjie beteken niks voor die Almagtige God nie. Sy wil en Sy Woord is al wat saak maak. Sy Woord is die finale antwoord. PUNT.

Voorbereiding vir ’n ontmoeting met die Allerhoogste

Ek wil graag dit oorbring dat dit voorbereiding kos om die aangesig van God te soek, dat dit tyd op jou knieë is wat jou bring op God se heilige plek, dat jy moet verstaan dat jy in nederigheid niks moet word voor die Skepper van alles wat gesien kan word en alles wat nie gesien kan word nie.

Daarmee sê ek nie dat jy nie deur die dag met God kan praat, na Hom uitroep in die uur van nood of Sy beskermende hand oor jou kan vra waar jy deur die dag gaan nie. Ons praat heir van jou intieme vurige binnekamer gesprekke en ontmoetings met God. Daar waar jy geestelik gevorm word.

Jy kan nie net in die troonkamer van God instorm nie. ’n Intieme verhouding met God is ’n voorreg, nie ’n reg nie. Maar is die wat die Woord sê? Ja dit is.

maar die wat op die HERE wag, kry nuwe krag; hulle vaar op met vleuels soos die arende; hulle hardloop en word nie moeg nie, hulle wandel en word nie mat nie. Jesaja 40:31

Dit is werklik nodig om die tyd uit te koop vir God. Geestelike groei kan nie plaasvind sonder ’n soeke na en ’n wag op God nie. Slegs Hy kan jou vernuwe, slegs Hy is in staat om jou werklik te laat opvaar met die vleuels van die arende. Is jy bereid om soms stil te bly en op God te wag?

Dawid laat sy hart ondersoek

Dawid het die regte idee beet wanneer hy voorberei dat God met hom sal handel. Hy verstaan dat God sy volle wese ken en dat daar niks is wat hy vir God kan verberg nie, dan kom lê hy alles voor God bloot. Hy vra God om sy hart te kom ondersoek, sodat hy sy hart suiwer kan maak en goedkeuring kan ontvang om God se heilige plek, Sy teenwoordigheid, te betree.

Is dit nie dalk waar ons ook moet begin in ons soeke na die aangesig van God nie?

Deurgrond my, o God, en ken my hart; toets my en ken my gedagtes; en kyk of daar by my 'n weg is van smart, en lei my op die ewige weg! Psalm 139:23-24

Moses se ontmoeting met God op Sy heilige plek

Toe Moses God wou nader, het die Here hom eers gestop, want die toestand waarin hy op daardie oomblik was, was nie aanvaarbaar vir God nie, hy moes eers iets aflê en agter los voor hy die heilige plek van God betree, hy moes sy vuil stowwerige skoene agterlaat.

Dit is vir my asof sy skoene amper gesien kan word as sy kontak met die vuil wêreld en dat God dit nie gaan toelaat op Sy heilige plek nie. God sê vir Moses:

En Hy sê: Moenie nader kom nie. Trek jou skoene van jou voete af, want die plek waar jy op staan, is heilige grond. Ekodus 3:5

Ester as voorbeeld van voorbereiding

Ons kry uit die boek Ester ’n pragtige prentjie van hoe te werk gegaan moet word om voor te berei vir ’n ontmoeting met ’n koning, hoe jy optree in die teenwoordigheid van ’n koning en wat jy doen om die guns te wen van ’n koning. Hoeveel meer moet ons nie bereid wees om te doen vir die Koning van konings nie? Kom ons kyk na ’n paar belangrike dele uit die verhaal van Ester.

Ek wil begin met die voorbereiding vir die ontmoeting met die koning.

... want so lank het die dae van hulle voorbereiding geduur: ses maande lank met mirre-olie en ses maande met balsem en ander skoonheidsmiddele van die vroue -- Ester 2:12

Hierdie is vir my baie soos die reininging van die hande waarvan Psalm 24 praat. ’n Jaar lank moes Ester voorberei en met skoonheidsmiddele behandel word voordat sy eers toegelaat is om ’n ontmoeting met die koning te hê. Moenie verbaas wees as jy vir God soos Dawid in Psalm 139 vra om jou hart te ondersoek en die Heilige Gees hou jou vir aande wakker met kritiese oortuigings- en reiningingswerk om jou sodoende voor te berei vir ’n ontmoeting met God nie.

God sal jou reining, God sal Sy skoonwassende werk in jou lewe doen. Moenie die fout maak om te dink dit gaan maklik wees nie, dit gaan seer wees, dit gaan iets van jou kos.

Ester se hartsbegeerte

Die ander deel waarna ek wil kyk uit die verhaal van Ester is die begeerte van haar hart, wat vir haar belangrik is tydens haar ontmoeting met die koning.

Toe die beurt van Ester, die dogter van Abígail, die oom van Mórdegai, wat haar as sy dogter aangeneem het, kom om in te gaan na die koning, het sy niks verlang nie, behalwe wat Hegai, die hofdienaar van die koning wat die vroue bewaak, gesê het; en Ester het guns gevind in die oë van almal wat haar gesien het. Ester 2:15

Jy sien, die vroue kon enigiets vanuit die vrouehuis neem vir hul ontmoeting met die koning, hulle kon die pragtigste juwele, die beste reukmiddels vir hulself toegeëin het om daardeur ’n indruk te probeer maak op die koning.

Maar Ester weet dat Hegai die koning ken en dat Hegai sal weet wat ’n indruk op die koning sal maak sodat sy guns in die koning se oë kan vind.

Ester neem dit wat Hegai gesê het, nie omdat sy hom daardeur wil beindruk nie, maar sodat sy guns in die oê van die koning kon wen.

Ester gebruik dus vir Hegai om tot kennis te kom van dit wat die koning sal behaag. So behoort kinders van God die Woord te gebruik om tot kennis te kom van dit wat God sal behaag.

Die fokus van ons hart in ons soeke na die aangesig van God

Dan moet ons fokus net soos Ester sin wees, ons moet nie fokus op onsself en hoe ons lyk of wat vir ons belangrik is nie, ons moet soos Ester gefokus het op dit wat die koning sou behaag, fokus op dit wat God sal behaag. Dit is ’n suiwer hart.

Daar is baie waarhede nog in die Woord, wat vir my wys hoe ek myself moet reining om die aangesig van God te soek. Daar is Johannes die doper, daar is die leering wat Paulus van Jesus af ontvang het , daar is Noag wat die ark bou, Abraham se gehoorsaamheid as hy seker soms nie verstaan het nie, Elia in die grot, maar ek wil afsluit op ’n baie belangrike punt.

HY IS ’N HEILIGE GOD

God is dieselfde gister, vandag en more, God is ’n heilige God.

Die beginsel van die wysheid is die vrees van die HERE, en kennis van die Heilige is verstand. Spreuke 9:10

Maar Josua het vir die volk gesê: Julle kan die HERE nie dien nie, want Hy is 'n heilige God... Josua 24:19

Kom jy nog na God toe in aanbidding met respek vir Hom, besef jy nog dat Hy ’n heilige God is?

As jy nie doen nie, kan jy nie op God se heilige plek staan nie.

’N SMEKING TOT INKEER

Dit is nou alles goed en wel, jy kan selfs vir my sê hierdie is inspirerende woorde om mense op te roep tot ware heiligmaking, maar hoekom? Hoekom is dit nodig om my hande te reining en my hart te suiwer?

Party mense het al vir my iets soos dievolgende gesê: “Dit is vir my goed genoeg om net in die hemel te kom, ek gee nie om oor al die res nie”

Tog as ons dit weer meet teen die Woord, dan is hierdie gesindheid nie aanvaarbaar nie.

My volk gaan te gronde weens gebrek aan kennis; omdat jy die kennis verwerp het, sal Ek jou verwerp, sodat jy vir My die priesteramp nie sal bedien nie; omdat jy die wet van jou God vergeet het, sal Ek ook jou kinders vergeet. Hosea 4:6

En kyk, Ek kom gou, en my loon is by My, om elkeen te vergeld soos sy werk sal wees. Openbaring 22:12

Ken Hom in al jou weë, dan sal Hy jou paaie gelykmaak. Spreuke 3:6

Want dit is die verbond wat Ek ná dié dae sal sluit met die huis van Israel, spreek die Here: Ek sal my wette in hulle verstand gee en dit op hulle hart skrywe; en Ek sal vir hulle 'n God wees, en hulle sal vir My 'n volk wees. Hebreërs 8:10

Wil jy werklik aanhou om die oortuiging van die Heilige Gees uit te doof? Het jy werklik geen begeerte om jouself nederig te maak voor die Allerhoogste nie? Dan is daar nie ’n makliker manier vir my om dit vir jou te sê nie, jou geestelike lewe is in ’n sieklike toestand.

Hy wat My nie liefhet nie, bewaar my woorde nie; en die woord wat julle hoor, is nie myne nie, maar is van die Vader wat My gestuur het. Dit het Ek tot julle gespreek terwyl Ek by julle bly; maar die Trooster, die Heilige Gees, wat die Vader in my Naam sal stuur, Hy sal julle alles leer en sal julle herinner aan alles wat Ek vir julle gesê het. Johannes 14:24-26

My vriend, dit is tyd dat ek en jy saam terugdraai na die kruis op Golgota en werklik sien wat daar gebeur het. Werklik sien waardeur Jesus gegaan het toe hy geslaan en deursteek is vir my en jou sondes.

Hoekom koester jy daardie sondes wat jou Verlosser so seer gemaak het?

Só moet julle dan bid: Onse Vader wat in die hemele is, laat u Naam geheilig word Matteus 6:9

Salig is die wat rein van hart is, want hulle sal God sien. Matteus 5:8

Het Christenskap 'n geloof van kompromie geword?

Vir lank is daar al ‘n hewige wroeging in my hart. Christene is besig om die evangelie goedkoop te maak en min, indien enige, is besig om op te staan om die gesonde leer van die Here Jesus Christus te verdedig. Ons het ‘n ruggraatlose samelewing geword wat vir niks meer staan en vir enige iets val.

Seker die mees aangehaalste teksgedeelte in die Woord was altyd Johannes 3:16. Vandag egter, is die teksgedeelte wat jy die meeste hoor Matteus 7:1. Hierdie teksgedeelte word so buite konteks gebruik om mense se humanisme aan te vuur, sodat hulle nooit voor die spieël van ‘n Heilige God se standaard hoef te staan nie. Ons verwerp die oordele van God, want God is liefde, hiermee durf geen van ons stry nie, want ieder en elk van ons is hellelinge, oppad na ‘n ewige verderf en slegs deur die genade van ‘n liefdevolle God kon die skip van ons lewensrigting verander na ‘n veilige hawe. Jy sal egter nooit in die Woord lees dat God liefde, liefde, liefde is nie, ons lees wel Hy is HEILIG, HEILIG, HEILIG. Tog bring ons soveel onheilighede voor die aangesig van ‘n absolute Heilige God. Ons besoedel Sy Heiligdom met ons rebelse lewens en ons onwilligheid om ons lewens in te rig volgens die standaard wat Hy daar gestel het. Ons is vriende van die wêreld en dink steeds ons kan bly gemeenskap hou met God. Jy kan nie. As jou denke meer wêrelds is as op God gefokus, dan moet jy reeds besef, jy het ‘n vriend van die wêreld geword en ‘n vyand van God.

Wat dan is die gesonde leer?

Dat geen mens goed in hom het nie, hy is ‘n rebel wat die god van sy eie lewe wil wees, wat as hy kon, God van Sy troon sou afruk en Hom doodmaak om self op daardie troon te sit, net soos sy vader die duiwel. Hy is tot niks goeds in staat nie. Hy kan die Here nie ken nie, want hy is so totaal deur sy sonde verwyder van ‘n heilige God, dat hy Hom nie kan soek nie en Hom nie wil soek nie. Ons kan maar net Romeine 3 gaan lees om die duisterheid van hierdie prentjie te verstaan.

Die skip van jou lewe is oppad na ‘n hawe van verwoesting en dit is slegs God wat jou rigting kan verander na ‘n veilige hawe. Sonder Hom sal jy daar nie uitkom nie, want jy ken die pad daarheen nie en sal dit nooit vind nie. As jy Hom nie ken nie, ken jy nie die weg na die veilige hawe nie en dus moet jy Hom persoonlik ken sodat Hy die Stuurman van jou skip kan word.

Hoe kan jy Hom ken? Deur perfek, volkome regverdig en totaal heilig soos Hy te wees. En dit is hier waar die krisis van die eeue inkom, hoe kan ‘n absoluut sondige, volkome ongeregtige en totaal onheilige wese wees soos Hy wat die teenoorgestelde is?

JESUS!

Jesus antwoord hom: Ek is die weg en die waarheid en die lewe; niemand kom na die Vader behalwe deur My nie.

Johannes 14:6

Enige een wat hierdie evangelie nie suiwer verkondig nie, is nie ‘n gesant van God nie. Ons is nie deur Hom uitgestuur om motiveringssprekers te word, om weeshuise te begin en die hele wêreld te bemoedig en hulle op te tel uit hulle verdrukking nie. Ons is nie deur Hom uitgestuur om gebedsdae vir reën uit te roep en mense op te roep tot gebed vir die wêreld nie. Nee, ons is deur Hom uitgestuur om mense Sy dissipels te maak, hulle te leer in alles wat Hy ons geleer het en hulle te doop in die naam van die Vader en die Seun en die Heilige Gees.

Om ‘n dissipel te word van Jesus sal beteken jy begin heilig lewe soos Hy heilig lewe. Dit beteken nie jy gaan nie val nie, dit beteken nie jy gaan nie sondig nie, maar dit sal jou hartsbegeerte wees om in die voetspore te volg van die Man wat reeds deur die dal van die dood gegaan het om jou saam met Hom by die poorte van die lewe uit te bring. Jy kan dit nie word as jy nie saam met Hom en in Hom gekruisig is nie. Jy sal nie met ‘n greintjie selfgeregtigheid deur die oog van die naald gaan nie, jy sal Hom moet toelaat om jou absoluut te verander in dit wat Hy jou wil maak. Klei in die hande van ‘n Meester Pottebakker.

Die dissipel van Jesus sal heilig word. Dit beteken hy sal afgesny word van die wêreld, eenkant gesit word vir diensbaarheid aan God, nie van die wêreld nie, maar ‘n reisiger oppad na ‘n stad waarvan God die fondamente gelê het. Gaan lees Hebreers 11, gaan lees Pilgrim’s Progress, dat jy weer kan verstaan hoe die pad lyk wat geloop moet word, die smal pad waar al wat jou sal deurdra die genade van God en die fokus van jou oog op die ewige stad is.

Hiermee word nooit jou verantwoordelikheid teenoor die in die wêreld negeer nie, daar word nie geimpliseer dat jy nie bid vir reën of die siekes besoek en die gebrokenes bemoedig nie. Al hierdie dinge is ‘n uitvloeisel van die fokus van jou oog, die heiligheid van jou lewe, dit sal voortvloei uit jou verhouding met die Pottebakker want as dit nie doen nie, is dit goed in die wêreld se oë, maar sonde in Sy oë, want dit dien nie tot die verheerliking van Sy naam nie, maar tot die verheffing van die mens.

As julle dan saam met Christus opgewek is, soek die dinge daarbo waar Christus is en aan die regterhand van God sit.

Bedink die dinge wat daarbo is, nie wat op die aarde is nie.

Want julle het gesterwe, en julle lewe is saam met Christus verborge in God.

Wanneer Christus, wat ons lewe is, geopenbaar word, dan sal julle ook saam met Hom in heerlikheid geopenbaar word.

Kolossense 3:1-4

Maar soek eers die koninkryk van God en sy geregtigheid, en al hierdie dinge sal vir julle bygevoeg word.

Matteus 6:33

Tog is ons bereid om soveel kompromieë aan te gaan wanneer dit kom by die evangelie. Is die evangelie tog nie vir ons in die Woord opgeteken dat ons dit kan verstaan en volledig kan leer nie? Hoeveel leeraars en kerklidmate is nog bekwaam om die evangelie te verkondig, hoeveel persent van die evangelie wat verkondig word is nog suiwer?

By nadere ondersoek word dit duidelik dat daar in meeste kerke hierdie Sondag nie eers oor die hel gepreek sal word nie. Ons preek nie oor die hel nie, want ons wil nie aanstoot gee nie. As ‘n prediker nie oor die hel preek en die verlore toestand van die mens nie, preek hy nie ‘n suiwer, volledige evangelie nie. Hy preek ‘n mensgebasseerde evangelie wat ontwerp is om mense goed te laat voel en verlore siele valse versekering te gee dat hulle hemel toe gaan terwyl hulle in waarheid oppad is na die hawe van verwoesting.

"Don't try to be more loving than Jesus: Talk about Hell!" - John F. MacArthur.

Jy kan vandag vir iemand vra: Wil jy hemel toe gaan? Meeste sal ja antwoord. Daarom gaan dit nie oor of jy hemel toe wil gaan of nie, ek wil nie hemel toe gaan om in die strate van goud te loop nie, ek wil hemel toe gaan want God is daar! Daar sal ek my Verlosser van aangesig kan beskou. Maar jy sien, meeste wil hemel toe gaan, maar hulle wil nie vir God daar kry nie, want dan gaan jy voor Hom moet staan en rekenskap gee. Hoekom is waarheid relatief in die tyd waarin ons leef? Want as ‘n mens besef daar is ‘n absolute waarheid, dan besef hy, hy gaan hom ondergeskik moet stel aan daardie absolute waarheid. Daardie absolute waarheid is vir ons opgeteken in die Woord, tog bou soveel hulle geloof en sekerheid op emosies. Jy hoor die een ou sê: “God het vir my gesê” en dan die ander “Nee maar God het vir MY gesê” en NIE EEN doen die moeite om te gaan na die absolute bron van waarheid nie. Nee, want as ons gaan moet lewe volgens die aboslute waarheid, dan gaan dit ons begin kos, dit gaan kos dat jy daardie televisie moet afsit, daardie televisie waarmee jy jou kinders vermaak hou sodat jy nie vir hulle hoef aandag te gee nie, maar jy besef nie jy is besig om hom vol riool te prop van ‘n goddelose wêreld nie.

Egbrekers en egbreeksters, weet julle nie dat die vriendskap van die wêreld vyandskap teen God is nie? Wie dan 'n vriend van die wêreld wil wees, word 'n vyand van God.

Jakobus 4:4

Wanneer ons worstel met ons sekerheid van saligheid of iemand ontmoet wat worstel, dan is ons vol raad, ons is vol bemoediging en sê vir daardie persoon: “Hou op twyfel, dit is net die duiwel wat jou aanval”, want ons basseer ons sekerheid op ‘n gebedjie wat ons eendag opgesê het om die deur van ons hartjie vir liewe Jesus oop te maak. As jy dit doen is jy besig om vir daardie persoon valse sekerheid te gee, jy sal NÊRENS in die Woord vind dat iemand sy hartjie vir liewe Jesus oopgemaak het nie. Daardie teksgedeelte in Openbaring 3 word so buite konteks gebruik en geen, maar geen historiese of hedendaagse gerespekteerde student van die Woord sal met my verskil nie. Die Woord leer egter:

En 'n vrou met die naam van Lídia, 'n purperverkoopster van die stad Thiatíre, 'n godsdienstige vrou, het geluister; die Here het haar hart geopen om ag te gee op wat deur Paulus gesê is.

Handelinge 16:14

Ons durf nie een wat onder die oortuigingswerk van die Heilige Gees kom valse gemoedsrus gee nie, ons behoort te doen wat Paulus gedoen het, ons behoort terug te gaan na die Woord:

Ondersoek julself of julle in die geloof is; stel julself op die proef. Of is julle nie seker van julself dat Jesus Christus in julle is nie -- as julle ten minste nie verwerplik is nie!

2 Korintiërs 13:5

Maar nee, die mens vandag wil niks met teologie en dogma te make hê nie en deur sulke dwase uitlatings besef hy nie dat hy daarmee impliseer dat hy homself nie sal stel onder die leer en woord van Jesus Christus nie. Ondersoek jouself aan die teologie en dogma van God se Woord of jy waarlik in die geloof is. Wanneer God ‘n werk in ‘n mens begin het, sal Hy dit voleindig, maar hoe weet jy of God waarlik ‘n werk in jou begin het? Nie deur ‘n gebedjie wat jy gebid het of oordat jy opgestaan het na die prediker se uitnodiging om aan te sluit by die kanselpartytjie nie, maar deur jou lewe te meet aan die Woord?

Hoe weet ons of iemand waarlik wedergebore is in vandag se tyd? Dieselfde manier hoe ons altyd geweet het. SY LEWE VERANDER! En die vrug wat hy dra is die vrug van die Gees, sy lewe sal gekenmerk word, nie deur perfeksionisme nie, maar dat hy deur die Gees wandel en nie deur die vlees nie. Jy gaan dikwels deur die vlees handel, maar ‘n ware geredde mens sal nie deur die vlees wandel nie.

Klink hierdie woorde veroordelend? Dit is baie moontlik dat dit vir jou doen, maar dit is nie die woorde van ‘n mens nie, maar die Woord van God. Dit is nie ‘n mens wat hier skryf in veroordeling nie, maar ‘n blote verwysing na die leer van die Woord van God. Besef jy hoeveel liefde dit vat om hierdie te skryf? Ek besef dat baie my sal afmaak as ‘n ekstremis, baie sal my afmaak as wetties, baie sal moontlik nooit weer na my wil luister nie en tog ag ek myself nie bo die leer van Christus nie. Dit is die leer waarby ek sal staan en dit is die leer waarby ek sal val. Vir hierdie leer sal ek met my lewe baklei en elkeen wat hierdie leer verwerp of homself ‘n leeraar, evangelis of gesant van God noem en nie hierdie leer in sy suiwerste vorm verkondig nie, sal ek ook verwerp as ‘n dwaaleeraar.

As iemand iets anders leer en nie instem met die gesonde woorde van onse Here Jesus Christus en met die leer wat volgens die godsaligheid is nie,

dié is verwaand en verstaan niks nie, maar het 'n sieklike sug na twisvrae en woordestryd waaruit ontstaan afguns, twis, lasteringe, bose agterdog,

nuttelose stryery van mense wat verdorwe in hulle verstand en van die waarheid beroof is en dink dat die godsaligheid winsgewend is. Onttrek jou aan sulke mense.

Maar die godsaligheid saam met vergenoegdheid is 'n groot wins.

Want ons het niks in die wêreld ingebring nie; dit is duidelik dat ons ook niks daaruit kan wegdra nie.

Maar as ons voedsel en klere het, moet ons daarmee vergenoeg wees.

Maar die wat ryk wil word, val in versoeking en strikke en baie dwase en skadelike begeerlikhede wat die mense laat wegsink in verderf en ondergang.

Want die geldgierigheid is 'n wortel van alle euwels; en omdat sommige dit begeer, het hulle afgedwaal van die geloof en hulleself met baie smarte deurboor.

Maar jy, man van God, vlug van hierdie dinge weg, en jaag ná die geregtigheid, godsaligheid, geloof, liefde, lydsaamheid, sagmoedigheid.

1 Timoteus 6:3-11

Op hierdie gronde en hierdie woorde en die totaliteit van die Woord verwerp ek ook enige voorspoeds-evangelie en enige mensverheerlikings-evangelie, hierdie evangelies is aan die orde van die dag en is nie van God nie.

Ons kan nie swak verskonings gebruik dat iemand net ‘n mens is en dus geregtig is om foute te maak nie. Magtig mense, ons praat hier van mense se siele, nie ‘n verkeerde diagnose vir ‘n verkoue wat eintlik ‘n sinusprobleem was nie. Mense gaan dood onder valse versekering oordat hulle nooit die volle evangelie gehoor en geleer het nie, kan ons bekostig om sulke foutjies te maak?

Moenie baie leermeesters wees nie, my broeders, omdat julle weet dat ons 'n groter oordeel sal ondergaan.

Jakobus 3:1

Daarmee word nie geimpliseer dat ‘n leeraar noodwendig sekulêr geskoold of gegradueerd hoef te wees nie, maar hy moet soliede onderrig in die Woord ontvang het. Hiermee impliseer ons nie jong manne kan nie leeraars word nie en so dikwels word gereken hoe jonger jy is hoe minder is jy in staat om die volle raad van God te verkondig, dit is bloot net nie waar nie. Vir ‘n voorbeeld van beide gevalle sal ek CH Spurgeon se bediening as gebruik. Op 19 jarige ouderdom het Spurgeon tot bekering gekom en is binne ‘n jaar in die bediening in waar hy die leeraar geword het van die toe grootste Baptiste gemeente in Londen. Self was hy ‘n baie jong man, het geen formele akademiese onderrig gehad nie, maar hy was bekwaam met die Woord van God en het die volle raad van God verkondig en bedien. Hy het groot geword in ‘n huis waar sy pa ‘n leeraar was, hy was goed onderrig in die Woord van God en het die studie daarvan sy lewensmissie gemaak. Hy het duisende teologiese boeke in sy eie studeerkamer gehad en was ‘n wel belese man gewees met sy eie universiteit, sy eie weeshuis, sy eie publikasie maatskappy. Gaan lees die biografie van Spurgeon, dit het alles begin by ‘n soeke na die koninkryk van God en ‘n struweling met sy saligheid sodat hy die volle evangelie kon verstaan, tot die dag wat God gekom en gesê het: “Jy is Myne”.

Laat niemand jou jonkheid verag nie, maar wees 'n voorbeeld vir die gelowiges in woord, in wandel, in liefde, in gees, in geloof, in reinheid.

Totdat ek kom, moet jy aanhou met voorlesing, vermaning en lering.

Verwaarloos nie die genadegawe wat in jou is nie, wat jou gegee is deur die profesie met die handoplegging van die ouderlinge.

Wees vlytig in hierdie dinge, leef daarin, sodat jou vooruitgang vir almal duidelik kan wees.

Let op jouself en op die leer; volhard daarin; want deur dit te doen, sal jy jouself red sowel as die wat jou hoor.

1 Timoteus 4:12-16

Laat ons ook dus nie versuim om die volle raad van God te verkondig nie, tydig en ontydig, in seisoen en buite seisoen. Laat ons nie die krag van die Woord van God onderskat nie en laat ons nie toelaat dat ons verskonings begin soek om mense aan die gehoor te streel deur ‘n afgewaterde, gebrekkige en valse evangelie te verkondig nie.

Ek besweer jou dan voor God en die Here Jesus Christus, wat die lewende en die dode sal oordeel by sy verskyning en sy koninkryk:

verkondig die woord; hou aan tydig en ontydig; weerlê, bestraf, vermaan in alle lankmoedigheid en lering;

want daar sal 'n tyd wees wanneer hulle die gesonde leer nie sal verdra nie, maar, omdat hulle in hul gehoor gestreel wil wees, vir hulle 'n menigte leraars sal versamel volgens hulle eie begeerlikhede,

en die oor sal afkeer van die waarheid en hulle sal wend tot fabels.

2 Timoteus 4:1-4

Waar gaan ons die lyn van kompromie trek? Hoeveel van die evangelie van Jesus Christus is ons bereid om prys te gee om meer tegemoedkomend te wees? Sal ons die Soewereiniteit, Beskikking en Bepalende Wil van God prys gee en dit ondergeskik stel aan die wil van die mens en daardeur die mens God se instaatsteller maak? Sal ons die absolute verlorendheid en onvermoë van die mens om homself te red, prysgee vir ‘n evangelie waar die mens se werke en keuses om tot geloof te kom, en in geloof te bly, ‘n bydraende rol tot sy saligheid speel? Sal ons die verkondiging van die verdoemenis van die ongereddene in ‘n ewige vuurpoel prysgee sodat ons meer mense in ons kerk kan kry, die skatkis vermeerder en ongeredde mense salig bemoedig en gerusstel deur hulle nie te wys op die hawe van verwoesting waarheen hulle oppad is nie? Sal ons die absolute krag van God waardeur Hy Sy Naam verhoog en Sy Glorie vermeerder prysgee vir ‘n sisteem wat bepaal dat God kragtig genoeg was om jou uit Egipte te bring, maar nooit kragtig genoeg was om jou in die beloofde land in te bring en daardeur toelaat dat die nasies Hom tot bespotting maak?

Maak jou kosteberekening broer, bereken jou evangelie suster, want daarmee gaan jy verantwoording doen voor ‘n regverdige en heilige God.

Hierdie is my heuwel en op hierdie heuwel sal ek sterf.